Barnsskónum sleit ég í Garðabænum, en síðan 2005 hefur Hafnarfjörður, heimabær eiginkonu minnar, einnig verið minn heimabær. Hér hef ég byggt upp heimili ásamt fjölskyldu minni og lagt mig fram um að taka virkan þátt í samfélaginu.

Ég er kvæntur og þriggja barna faðir. Eiginkona mín er Elísabet Birgisdóttir, sjúkraþjálfari og eigum við saman þrjú börn: Tómas (f. 2005), Kolbrúnu (f. 2011) og Theódór (f. 2018).

Starfsreynsla mín spannar rekstur, frumkvöðlastarf og félagslega uppbyggingu. Eftir að háskólanámi lauk starfaði ég um árabil hjá Borgun hf., vann í framhaldi af því með framsæknu fólki að uppbyggingu fjártæknifyrirtækis með alþjóðlega starfsemi, þar sem ég sit nú í stjórn, og jafnframt hef ég einnig á hendi stjórnarformennsku hjá Provision ehf. auk þess að leiða uppbyggingarstarf Klifurfélags Reykjavíkur sem formaður. Síðastliðin 2 ár hef ég starfað sem framkvæmdastjóri Fimleikafélagsins Björk, en þar vinn ég með traustum og fjölmennum hópi að öflugu barna- og ungmennastarfi, þar sem áhersla er lögð á faglegan rekstur og skýra forgangsröðun í þágu samfélagsins.